म.टा.प्रतिनिधी, नागपूर आरोग्यासाठी सूर्यनमस्काराचे महत्त्व पुरातन काळापासून सांगण्यात आले आहे. याबाबत अधिक जागृती करण्यासाठी राष्ट्रसंत तुकडोजी महाराज नागपूर विद्यापीठाने पाऊल उचलले आहे. याअंतर्गत घालण्याचा उपक्रम १ ते ७ फेब्रुवारीदरम्यान विविध कॉलेजांमध्ये राबविला जाणार आहे. स्वातंत्र्याच्या अमृतमहोत्सवानिमित्त हे आयोजन आहे. या अभियानांतर्गत कॉलेजांनी सकाळी सात ते आठ या वेळेस कॉलेजांमध्ये सूर्यनमस्कार घालावेत. सर्वोत्तम प्रतिसाद देणाऱ्या कॉलेजांना जिल्हानिहाय प्रमाणपत्र देऊन पुरस्कृत करण्यात येणार आहे. जेथे प्रत्यक्ष शक्य नाही, तेथे ऑनलाइन स्वरूपात हा उपक्रम घेण्यात येईल, असे विद्यापीठाने कळविले. दरम्यान, शुक्रवारी राष्ट्रसंत तुकडोजी महाराज नागपूर विद्यापीठाचा क्रीडा व शारीरिक शिक्षण विभाग आणि क्रीडा भारतीच्या सहकार्याने सूर्यनमस्कार प्रात्यक्षिकांचे आयोजन करण्यात आले होते. विद्यापीठाचे व्यवस्थापन परिषद सदस्य डॉ. मिलिंद बारहाते प्रमुख अतिथी होते तर पी.डब्ल्यू.एस. कॉलेजचे प्राचार्य डॉ. यशवंत पाटील विशेष अतिथी म्हणून उपस्थित होते. अध्यक्षस्थानी क्रीडा भारतीचे राष्ट्रीय सहमंत्री प्रसन्न हरदास होते. विद्यापीठाचे क्रीडा व शारीरिक शिक्षण संचालक डॉ. शरज सूर्यवंशी यांच्यासह इतर मान्यवर उपस्थित होते. प्रास्ताविक डॉ. अमित टेंभुर्णे, सूत्रसंचालन डॉ. सोनाली शिरभाते यांनी केले. डॉ. देवेंद्र वानखडे यांनी आभार मानले. यावेळी खेलो इंडिया विद्यापीठ क्रीडास्पर्धांसाठी निवड झालेल्या विद्यापीठाच्या संघाने सूर्यनमस्काराची १३ प्रात्यक्षिके सादर केली.
from Career News in Marathi: Career News, मराठी Career बातम्या | Maharashtra Times https://ift.tt/32rSpEQ
Comments
Post a Comment