युक्रेनमधून परतलेल्यांसाठी लवकरच नवे धोरण; वैद्यकीय शिक्षणमंत्री अमित देशमुख यांची ग्वाही

मुंबई: युक्रेनमधून महाराष्ट्रात परतलेल्या वैद्यकीय अभ्यासक्रमांच्या विद्यार्थ्यांच्या पुढील अभ्यासक्रमासाठी लवकरच नवे धोरण निश्चित केले जाणार असल्याची माहिती वैद्यकीय शिक्षणमंत्री यांनी दिली. त्यामुळे या विद्यार्थ्यांना लवकरच दिलासा मिळण्याची चिन्हे आहेत. या विद्यार्थ्यांसाठी कुलगुरूंच्या अभ्यासगटांची व्याप्ती वाढवून सकारात्मक दृष्टीने सर्व बाबींची तपासणी करून महिनाभरात अहवाल सादर करण्याचे निर्देश दिल्याचे देशमुख यांनी बुधवारी जाहीर केले. युक्रेनमधून महाराष्ट्रात परतलेल्या विद्यार्थ्यांचे नुकसान होऊ नये म्हणून विधान भवनात बैठकीचे आयोजन करण्यात आले होते. या बैठकीदरम्यान अमित देशमुख यांनी वरील आदेश दिले आहेत. या बैठकीस आमदार डॉ. मनीषा कायंदे, आमदार धीरज देशमुख, विभागाचे सचिव सौरभ विजय, आरोग्य विज्ञान विद्यापीठाच्या कुलगुरू डॉ. माधुरी कानिटकर, 'रूस एज्युकेशन'चे उपाध्यक्ष लिंकन, अमेरिकी विद्यापीठाचे कुलगुरू पवन कपूर, महाराष्ट्र वैद्यकीय परिषदेचे डॉ. एस. एस. उत्तुरे आणि खासगी विद्यापीठांचे प्रतिनिधी आणि अधिकारी उपस्थित होते. या वेळी अमित देशमुख म्हणाले, 'रशिया आणि युक्रेन या शेजारील सात ते आठ देशांतही अभ्यासक्रम सारखाच असल्याने इतर देशांसोबत सामंजस्याने या विद्यार्थ्यांना प्रवेश मिळेल का याबाबत चर्चा करण्याचा प्रस्ताव केंद्राला सादर करण्यात येईल. भारतात पुन्हा येणाऱ्या विद्यार्थ्यांना (NEET) सामाईक प्रवेश परीक्षा देण्यासही मानसिकरीत्या तयार करावे लागेल. याचबरोबर ऑनलाइन पद्धतीने युक्रेन सरकार शिक्षण देईल का या संदर्भातही विचार करावा लागणार आहे. युक्रेनमध्ये ३३ विद्यापीठे वैद्यकीय शिक्षण देत आहेत, १८ हजार विद्यार्थी शिक्षण घेत असून, दोन हजार विद्यार्थी हे केवळ महाराष्ट्राचे आहेत. आपल्या देशात वैद्यकीय शिक्षण घेण्यासाठी राष्ट्रीय पात्रता प्रवेश परिक्षा घेण्यात येते. मात्र, रशिया आणि युक्रेनमध्ये ही परीक्षा न देता प्रवेश मिळतो. तसेच, शैक्षणिक शुल्कही भारतातील शुल्कापेक्षा कमी आकारले जाते. या विद्यार्थ्यांना भारतातील विद्यापीठात सामावून घेण्यासाठी पुन्हा परीक्षा देणे गरजेचे आहे. अथवा अन्य उपाययोजना करणे गरजेचे असल्याचे मत कुलगुरू डॉ. माधुरी कानिटकर यांनी सादरीकरणादरम्यान सांगितले. वैद्यकीय शिक्षणमंत्री श्री. देशमुख म्हणाले, रशिया आणि युक्रेन देशाशेजारील ७ ते ८ देशांतही अभ्यासक्रम सारखाच असल्याने इतर देशांसोबत सामंजस्याने या विद्यार्थ्यांना प्रवेश मिळेल का याबाबत चर्चा करण्याचा प्रस्ताव केंद्राला सादर करण्यात येईल. भारतात पुन्हा येणाऱ्या विद्यार्थ्यांना (नीट) सामायिक प्रवेश परीक्षा देण्यासही मानसिकरित्या तयार करावे लागेल. याचबरोबर ऑनलाईन पद्धतीने युक्रेन शासन शिक्षण देईल का यासंदर्भातही विचार करावा लागेल. जे शिक्षण पूर्ण करून आंतरवासिता करीत आहेत त्यांना आधी काम द्यावे. जे विद्यार्थी शिक्षण घेत आहेत, त्यांना येथील विद्यापीठात वर्ग, प्रयोगशाळा, ग्रंथालय वापरासाठी उपलब्ध करून देण्याची व्यवस्था करण्यात येईल त्यासाठी संबंधित देशाच्या विद्यापीठाशी चर्चा करण्यात येईल. कुलगुरूंचा जो अभ्यासगट नेमला आहे. त्यांनी या सूचनांचा अभ्यासासाठी अंतर्भाव करावा व अहवाल महिनाभरात सादर करावा. जेणेकरून शासनास धोरणनिश्च‍ितीसाठी त्याचा उपयोग होईल. असेही मंत्री देशमुख यांनी यावेळी सांगितले.

from Career News in Marathi: Career News, मराठी Career बातम्या | Maharashtra Times https://ift.tt/7nkDhHl