Karnataka : कर्नाटकातून सुरू झालेल्या हिजाबचा वादावर देशभरातून प्रतिक्रिया उमटत आहेत. पाच राज्यांतील विधानसभा निवडणुकांच्या पार्श्वभूमीवर हिजाब मुद्द्यावरुन देशातील राजकारण चांगलेच तापले आहे. दरम्यान याच वादामुळे बंद असलेल्या कर्नाटकातील शाळा-कॉलेज पुन्हा कधी सुरु होणार हा प्रश्न विद्यार्थ्यांना पडला आहे. कर्नाटकचे मुख्यमंत्री बसवराज बोम्मई यांनी यासंदर्भात उच्चस्तरीय बैठक बोलावली असून संपूर्ण प्रकरणाचा आढावा घेऊन पुढील परिस्थितीवर चर्चा केली जाणार आहे. या बैठकीत शाळा-कॉलेज पुन्हा सुरु होण्यासंदर्भात निर्णय होण्याची शक्यता आहे. माध्यमांशी बोलताना मुख्यमंत्री बसवराज बोम्मई म्हणाले, "मी प्राथमिक आणि माध्यमिक शिक्षणमंत्री बीसी नागेश, राज्याचे गृहमंत्री आणि अधिकाऱ्यांसोबत बैठक घेणार आहे. जेणेकरून आतापर्यंत जे काही घडले त्यावर थोडक्यात चर्चा करता येईल.' याशिवाय राज्यातील सर्व हायस्कूल आणि कॉलेज बंद ठेवण्याचा कालावधी वाढवण्याचा निर्णयही गुरुवारी संध्याकाळी घेतला जाईल असेही ते म्हणाले. न्यायालयाच्या आदेशानुसार मुख्यमंत्री निर्णय घेतील- शिक्षणमंत्री कर्नाटक उच्च न्यायालयाच्या अंतरिम आदेशावर प्रतिक्रिया व्यक्त करताना राज्याचे शिक्षण मंत्री बीसी नागेश म्हणाले की, संध्याकाळी मुख्यमंत्र्यांच्या अध्यक्षतेखाली एक बैठक होईल. न्यायालयाचा आदेश जाणून घेतल्यानंतर आम्ही शाळा आणि ज्युनिअर कॉलेज पुन्हा सुरु करण्यासंदर्भात निर्णय घेऊ असेही बीसी नागेश म्हणाले. तोपर्यंत धार्मिक पोषाख नको कॉलेजमध्ये हिजाब परिधान करण्याच्या मुद्द्यावरून सुरू झालेल्या या वादावर उच्च न्यायालयात सलग तिसऱ्या दिवशी सुनावणी झाली. न्यायालय या प्रकरणी अंतिम निर्णय देईपर्यंत विद्यार्थ्यांनी कोणत्याही प्रकारचे धार्मिक पोषाख परिधान करण्यासाठी आग्रही राहू नये, असे निर्देश कोर्टाने दिले. या प्रकरणाची पुढील सुनावणी सोमवारी १४ फेब्रुवारी रोजी होणार आहे. दोन्ही बाजुच्या वकिलांचे म्हणणे ऐकून घेतल्यानंतर कोर्टाने वरील सूचना केल्या. विद्यार्थ्यांनी शांतता राखण्याचे आवाहनही कोर्टाने केले. शाळा बंद ठेवण्याचे आदेश कर्नाटक उच्च न्यायालयात सुरू असलेली सुनावणी आणि ठिकठिकाणी सुरू असलेले आंदोलन पाहता कर्नाटकचे मुख्यमंत्री बसवराज बोम्मई यांनी मंगळवारी राज्यातील सर्व हायस्कूल आणि महाविद्यालये पुढील तीन दिवस बंद ठेवण्याचे आदेश दिले आहेत. मुख्यमंत्र्यांनी त्यांच्या अधिकृत ट्विटर हँडलवरून ही माहिती दिली. तसेच विद्यार्थी, शाळा-कॉलेज व्यवस्थापन आणि सामाजिक-राजकीय संघटनांना शांतता राखण्याचे आवाहन केले आहे. हिजाब वादाचे प्रकरण सर्वोच्च न्यायालयात या प्रकरणाची कर्नाटक उच्च न्यायालयात सुनावणी सुरू होती. मात्र आता काँग्रेस नेते कपिल सिब्बल यांनी सर्वोच्च न्यायालयात याचिका दाखल करून या प्रकरणाची सुनावणी घेण्याची मागणी केली आहे. हे प्रकरण कर्नाटक उच्च न्यायालयातून सर्वोच्च न्यायालयात वर्ग करण्यात यावे, असे ते म्हणाले.
from Career News in Marathi: Career News, मराठी Career बातम्या | Maharashtra Times https://ift.tt/Y783pZS
Comments
Post a Comment