राज्यातील मुंबई वगळता अन्य महाविद्यालये आजपासून सुरू

म. टा. प्रतिनिधी, पुणे लॉकडाउनपासून बंद झालेली महाविद्यालयांची दारे अखेर आजपासून (सोमवार) खुली होतील. मर्यादित संख्येनेच विद्यार्थ्यांना प्रवेश मिळणार असल्याने काही काळ ही ऑनलाइन व ऑफलाइन अशा दोन्ही पद्धतीने सुरू राहतील. सुरुवातीच्या टप्प्यात महाविद्यालयांकडून पदव्युत्तर अभ्यासक्रमांच्या प्रात्यक्षिक भागावर भर असेल. त्यानंतर टप्प्याटप्प्याने उर्वरित अभ्यासक्रमांसाठीचे वर्ग सुरू होतील. करोनासंदर्भातील नियम पाळून सुरुवातीला नववी ते बारावी व नंतर पाचवी ते सातवीच्या शाळाही सुरू करण्यात आल्या. मात्र, महावि द्यालये बंदच असल्याने किमान प्रात्यक्षिकांसाठी तरी महाविद्यालये सुरू करा, अशी आग्रही भूमिका ‘महाराष्ट्र टाइम्स’ने सातत्याने लावून धरली होती. या पार्श्वभूमीवर पुणे विद्यापीठानेही जानेवारी महिन्यातच महाविद्यालये सुरू करण्याची तयारी केली होती. मात्र, उच्च व तंत्रशिक्षण विभागाच्या आदेशामुळे ही तारीख पुढे गेली. शेवटी उच्च व तंत्रशिक्षणमंत्री उदय सामंत यांच्या आदेशानुसार सोमवारपासून पुण्यासह राज्यातील महाविद्यालये खुली होणार आहेत. यासाठी पुणे महापालिकेनेही परवानगी दिली असून विद्यापीठानेही या संदर्भात परिपत्रक काढले आहे. सध्या शहरातील विविध महाविद्यालयांमध्ये सरकारच्या नियमांप्रमाणे करोना प्रतिबंधासाठी इमारत, वर्गाची स्वच्छता, सॅनिटायझेशनची व्यवस्था, शरीराचे तापमान मोजण्याची व्यवस्था, अंतर राखून वर्गातील बैठक व्यवस्था आदी कामे अंतिम टप्प्यात आहेत. काही महाविद्यालयांनी ऑनलाइन पद्धतीने संमतीपत्र उपलब्ध करून दिली होती. त्याला विद्यार्थी-पालकांनी चांगला प्रतिसाद दिला आहे. त्याचबरोबर जवळपास सर्वच महाविद्यालयांनी करोनासंदर्भात घ्यावयाची दक्षता, शासकीय नियम व अटी याबाबत विद्यार्थी-पालकांना ऑनलाइन पद्धतीने मार्गदर्शन केले आहे. मुंबईत तूर्त कॉलेज बंदच मुंबई महापालिकेने कॉलेजे सुरू करण्यास विद्यापीठाला आणखी काही काळ प्रतीक्षा करण्याचा सल्ला दिला आहे. मुंबई विद्यापीठाने कॉलेजे सुरू करण्यासंदर्भात पालिकेकडे विचारणा केली असता, २० फेब्रुवारीपर्यंत कॉलेजे सुरू करता येणार नाहीत, असे पालिका आयुक्त इक्बाल सिंह चहल यांनी सांगितले. आम्ही करोना रुग्णांच्या वाढत्या संख्येचा आढावा घेत आहोत, त्यानंतर पुढील निर्णय कळवण्यात येईल, असे त्यांनी सांगितले. मुंबईत पुढील सोमवारपासून म्हणजेच २२ फेब्रुवारीपासून कॉलेजे उघडण्याची शक्यता आहे. यूजीसी’ची मार्गदर्शक तत्वे - ताप, खोकला, श्वास घेण्यास त्रास होत असलेल्या विद्यार्थ्यांना प्रवेश नाही. - विद्यार्थ्यांना महाविद्यालयात प्रवेश देताना त्यांच्या शरीराचे तापमान मोजावे. - विद्यार्थ्यांनी मास्क परिधान करणे बंधनकारक. - निर्जंतुकीकरण यंत्रणेच्या उपलब्धतेची तपासणी. - विद्यापीठे, महाविद्यालयांनी नियमित निर्जंतुकीकरणासाठी कार्यप्रणाली निश्चित करावी. - विद्यार्थी, शिक्षक आणि प्रशासनातील कर्मचाऱ्यांनी ‘आरोग्य सेतू’ अ‍ॅप वापरावे. मुंबईत तूर्त कॉलेज बंदच मुंबई महापालिकेने कॉलेजे सुरू करण्यास विद्यापीठाला आणखी काही काळ प्रतीक्षा करण्याचा सल्ला दिला आहे. मुंबई विद्यापीठाने कॉलेजे सुरू करण्यासंदर्भात पालिकेकडे विचारणा केली असता, २० फेब्रुवारीपर्यंत कॉलेजे सुरू करता येणार नाहीत, असे पालिका आयुक्त इक्बाल सिंह चहल यांनी सांगितले. आम्ही करोना रुग्णांच्या वाढत्या संख्येचा आढावा घेत आहोत, त्यानंतर पुढील निर्णय कळवण्यात येईल, असे त्यांनी सांगितले. मुंबईत पुढील सोमवारपासून म्हणजेच २२ फेब्रुवारीपासून कॉलेजे उघडण्याची शक्यता आहे.

from Career News in Marathi: Career News, मराठी Career बातम्या | Maharashtra Times https://ift.tt/379D6Qf